5 LANG NA KBCUSA GINWANG NHTOI MASAT LABAN MUNGGA

HKRISTU HTA AMYU RUDI MAKA HPE SHANGANG SHAKANG GA.

(Shakawn Kungdawn 33:12, 1 Korinhtu 3:11,

Ga Shagawp 14:34. Yawhan 15:5)

Ga Nhpaw

KBCUSA Ginwang a Ga Baw rai nga ai “Hkristu hta Amyu Rudi Maka hpe Shangang Shakang Ga" ngu ai Mungga hpe, hkyen lajangna ahkaw ahkang lu ai majaw Karai Kasang chyeju hpe shakawn ai.

Anhte Wunpawng sha ni gaw, "Rudi Ru Hpang" (snr) "Ning pawt

Ninghpang" ngu nna, shaga ga ai. Kachin Wunpawng sha ni hta Rudi

Ruhpang kaw nna, Manu dan ai, kaja ai htunghking lailen, Yu ngwi

shingni hpaji, Mungding Tsi hpaji ni law law nga lai sai wa sai. Manu

dan la ai, mai kaja ai htunghking lai len ni hpe, Hkristu hta matut nna,

Rudi Maka shangang shakang ra nga ga ai. Kachin Wunpawng Myu

sha ni a mai kaja ai lailen ningli ni hpe gawn sumru dat yang, tsun n

mat, ka n mat rai nga ai. Amyu langai a npawt nhpang Rudi Maka hpe

Madu ntsa e, n gawgap yang, n grin lu ai hpe Chyum laika gaw shadum

nga ai. Zaibru ntsa e gap da ai nta zawn, nbung laru ni du wa yang, hten

run mat na re (Mahte 7:24-27). Dai ni anhte amyu sha ni a npawt

nhpang Ru di Maka hpe Hkristu hta, gara hku shangang shakang sa wa

lu na ngu ai hpe myit sumru mai nga ga ai.

1. Kaji Kawa ni a Shamai Shatsai Htunghking Maka hta

Karai Kasang a Hpaji Masa

"... asi gaw sha na matu, alap gaw ana ahkya shamai shatsai na matu,

tai na ra ai, nga nna ngai hpe tsun ai (Ezakela 47:12b)," ndai Chyum

laika hta tsun da ai hte maren, Karai Kasang gaw machyi makaw hkrum ai ni hpe yu lajang na matu, Wunpawng Mungdan na hpun ru, hpung lap ni hpe jai lang let,

Ji Woi ji Wa ni hpe hpaji byeng-ya jaw da ai. Nye wa (Slg. Masawn

La) gaw, anhte "Masawn" amyu ni, nat jaw prat kaw nna, lang hkrat wa

ai "Bum Tsi" ni hpe jai lang let, masha law law hpe shamai shatsai lai

wa sai re. Nye Wa gaw machyi masha ni hpe tsi n tsi shi yang, shawng

nnan, Karai Kasang kaw akyu hpyi ai hpang she, tsi tsi ai lam galaw

lai wa sai. Grau nna, sum tsan shara hta nga ai machyi ai masha a

"mying hte Yup ai (Position – jan pru/shang maga baw tawn yup ai

kun?)" sha chye yang, tsi ni hpe shagun jaw n ra ai sha, tsi kayak hpaji

hte shamai shatsai ai lam hpe galaw lu ai. Mungkan na “Tsi Sarawun

ni” gaw, Tsi hpaji kade chye tim, machyi ai masha tinang makau kaw

nga yang she, tsi tsi ya lu ai, hpaji jaw matsun ya lu ai. Wunpawng sha

ni lang hkrat wa ai mau na zawn re ai “Tsi hpaji ni” hpe matut nna,

Hkristu hta e jai lang mai nga ai. Sara Kaba Rev. Nngai Gam gaw, nat

jaw prat na mai kaja ai hpaji ni hpe n kabai kau da ai sha, matut jai

lang na matu, n-gun jaw lai wa sai re.

2. Kaji Kawa Ni A Tsawm Htap Ai Dawjau Lailen Maka Ni

Kachin Wunpawng myu sha ni gaw, Ji woi Jiwa ni prat kaw

nna, shada da karum shingdau hkat ai, pawnba hkat ai, lailen kaja ni

nga lai wa ai. Mare langai ngai, hku hku wa yang, kaga mare na ni kaw,

sha hpa karum hpyi wa yang, shada karum hkat ai lailen kaja ni nga lai

wa sai re. “Pu gang sin machyi” ngu ai “Ga” malai hte maren, shada

da tsawra myit madun hkat ai, pawnba hkat ai karum hkat ai lailen ni a

majaw, anhte Kachin Wunpawng amyu sha ni hta, "Maw hpyi" n nga

ai lam mung rai nga ai. Tinang a Kanu kawa, Kaji, kamoi ni, asak kaba

nna bungli n lu galaw mat ai raitim, kashu kasha ni lit la bau maka,

pawnba hkat ai a majaw, “Asak kaba sai ni a nta” (Senior homes) n nga

ai lam re. Dai zawn shada da pawnba hkat ai lam ni hpe matut nna,

anhte a kashu kasha ni hpe sharin ya mai nga ai. Kaji kawa ni a kaja ai

kasi ningli lailen ni hpe yu la let, Maigan mung ni hta, ninghtoi tai ra

nga ai. Yesu Hkristu mung, “Dai rai nna, masha ni gaw nanhte a kaja

ai bungli mu lu nna, sumsing lamu e nga ai nanhte a Kawa hpe shagrau

sha-a lu mu ga, shanhte a man e nanhte a nhtoi hpe htoi tu shangun da

mu law” (Mahte 5:16) nga nna, shadum tsun da ai.

3. Garan Kachyanan Hkat Ai Lam Gaw Wuhpung Wuhpawng Kata

Kahkyin Gumdin Lam Hpe Gawgap Ya Ai

Kachin Wunpawng amyu sha ni gaw, Jiwoi jiwa prat kaw nna,

shada da gam jaw gam ya ai lailen ningli kaja ni, nga lai wa sai. Kaga

mare na jinghku jing yu, Mayu Dama, kahpu kanau ni hpe myit dum

ai hku nna, (Jum, Majap, Shan chyahkraw, etc..) zawn re ai myit dum

kumhpa ni hpe, shada da shagun hkat lai wa ai re. Dai zawn myit dum

kumhpa shagun garan hkat ai lam gaw, grau nna, hku hkau ai hte tsawra

myit kaba wa na matu mung rai nga ai. Ngai kaji ten, Nye wa gaw nam

na "Chyahki, Shan Nga" ni lu gap wa yang, shan (Snr) "Min Chyu" ni

dawk ai hpang, mare na ni nawn ai nta hting gaw shagu hpe garan gajan

lai wa sai. Dai hte maren, Mare na jaugawng ni, chyahki, Shan Nga ni

lu wa tim, mare ding na nta hting gaw shagu ngu na daram, garan jaw

ai lailen ni galaw lai wa sai re. Dai zawn, gam jaw gam ya ai lailen

maka ni gaw grai kaja ai lai len maka ni re lam, chyum laika hta tsun

da ai. Dai majaw, Maigan Sasana sara kaba ni gaw Kachin Wupawng

sha ni a kaja ai arawn alai ni hpe yu let, Karai Kasang a lagaw hkang

hkang ai amyu re nga nna,"Nam maling kata na Nhtoi" or "Light in

the Jungle" ngu ai laika buk hta, ka da nga ai. "N daw n hta jaw ai wa

gaw, hpum wa na ra ai; Ntsin jaw bun ai wa gaw, jaw bun ai bai hkrum

na ra ai (Ga shagawp 11:25).” Anhte Myu sha ni Hkanan padang dip

lu na matu, jam jau hkam nna, shawng lam hta ap nawng shakut shaja

nga ai myu tsaw share ninghkring ni hte hpyen yen tsin-yam hkrum ai

ni hpe mung, Hkristu a myi man tau let matut manoi, karum madi

shadaw mai nga ai. “Mai kaja ai amu galaw na hte gam jaw gam ya ai

lam, hkum malap kau myit; shing re ai hkungga hpe, Karai Kasang

gaw sharawng awng nga ai” (Hebrews 13:16). Tsawra myit hte gam

jaw gam ya ai lam gaw Wuhpung Wuhpawng hpe Kahkyin gumdin

Lam Hpe Gawgap ya lu ai. Nawku hpung hpe mung, shangang shakang

ya ai hte Karai Kasang hpe mung sharawng awng shangun nga ai.

4. Madu A Magam Bungli Hta Ngang Ngang Tsap Nga Ga

Kachin Wunpawng sha ni a kaji kawa ni gaw Tengman ai Karai

Kasang a Mungga hpe, atsawm sha chye na da ma ai majaw, KBC hpe

ngang grin hkra, hpaw ninghtan da sai. Shanhte Chyum Laika hpe lu la

ai shaloi, dai hpe manu shadan hkaja let, shanhte a prat hpe gaw gap la

ma ai. Anhte Kachin Myu sha ni yawng gaw, Hkristu ngu ai baw hte

Lam shagu hta kaba rawt wa na matu, anhte amyu sha ni a hkrum zup

amu bawngban na shara, EC/KASA "Rap Daw" hte "Hpung Shawa

Zuphpawng kaba" ni hpe galaw nga ai re. KBC hta lawm ai buga hpung

400 jan a matu, akyu byin pru wa na lam hpe myit yu let, policy (sh)

hkrang ni, kaja dik ai hku jahkrat let, hkawm sa nga ai re. Dai majaw,

KBC gaw lani hte lani Hkristu hta e lam magup hta, rawt jat galu kaba

wa ai rai nga ai. Ji Woi Jiwa ni a Makam hkring htawng hpe tsawra ai

hku nna, "KBC a Policy (sh) Hkrang ni hpe hkan shadup mai nga ga ai.

KBCUSA Ginwang mung, Ji Woi Jiwa ni a makam hkring htawng hte

maren, mayak manghkang amyu myu hpe lai di nna, hpaw ninghtan da

ai makam masham Wuhpung wuhpawng rai nga sai. Ndai shata gaw

KBCUSA Ginwang byin wa ai 11 ning hpring nga sai. Kasa Pawlu

gaw Hebre hpung masha ni hpe, “Karai Kasang a mungga nanhte hpe

tsun dan ai, nanhte a lam woi ningshawng ni hpe, adum nga mu:

shanhte prat lai hkra hkan wa sai lailen ningli hpe myit sumru yu nna,

shanhte a kam sham ai hpunda hkap hkra, hkan sharau nga mu”

(Hebre13:7) nga nna, shadum sharin ai. USA hta nga ai anhte Kachin

myu sha ni mung, Hkristu hta myit hkrum let, KBCUSA Ginwang hta

shang lawm nna, Ji woi Jiwa ni a makam masham hpunda dep hkra,

shakut shaja sa wa ga. Kasa Pawlu mung Korinhtu hpung masha ni hpe,

“Dai re ai majaw ngai tsaw ngai ra ai hpu nau e, nanhte gun hpai ai

amu gaw dai Madu hta e kaman lila n rai nga ai dum chye nga let,

ngang ngang kang kang, dakring dalang nga nga nna, dai Madu a

bungli hta tut nawng e tsam mari shakut sharang nga nga mu law” ( 1

Korinhtu 15:58) nga nna, shadum sharin da ai re. KBC a Makam hkring

htawng hpe anhte a kashu kasha ni manu shadan tsawra chye wa na

matu, anhte kanu kawa tai nga ai ni, dakring dalang shakut shaja ra nga

ai.

5. Dinghpring Ai Lam Gaw Amyu hpe Gawgap Ai Lam

Dinghpring ai lam gaw shaman chyeju lu la ai lam rai nna,

yubak lam gaw hten byak ai lam re hpe, Israela ni (sh.) shinggyim ni

labau hta, asan sha mu lu nga ai. Israela amyu sha ni tengman ai lam,

tara rap ra ai lam, Karai Kasang hpe hkungga lara ai lam hta hkawm sa

ai ten, ngwi pyaw simsa ai hte ngamu ngamai lam hpe hkam sha lu nga

ai. Raitim, N kaja ai akyang lailen hte Karai Kasang a Mungga hpaji

byeng-ya hpe kau da ai shaloi, hkrat sum lam byin wa hpe, chye lu ai.

Ga Shagawp 14:24 hta “Ding hpring ai arawn alai gaw, mung masha

ni hpe shagrau nga ai; yubak mahtang, masha amyu ni a kaya kahpa

lam rai nga ai”. Ding hpring ai lam gaw, amyu langai hpe sharawt ya

ai lam shadum nga ai. Amyu langai jet ai n-gun atsam gaw hpyen dap,

mung masa, sut su nga mai ai lam ni n re ai sha, Karai Kasang a man e

dinghpring ai hku asak hkrung ai lam rai nga ai.

Ga Hpungdim

America kaw nga ai ni a asak hkrung lam gaw n loi nga ai.

Payment shachyut, nna, shani shagu bungli galaw shaja let, jai lang na

ja gumhpraw ni hpe tam shakut ra nga ai. Methodist hpung hpe hpaw

ninghtan ai wa John Wesley gaw “Earn all you can, give all you can,

save all you can.” Nang tam lu ai made tam u, nang jaw lu ai made

yawng jaw u, nang mahkawng lu ai made mahkawng da u” ngu

nna, hpung masha ni hpe hparan hpareng ai lam hte seng nna, shingran,

kadun tsun dan lai wa sai. Tinang lu ai made ja gumhpraw shang hkra

tam shakut nna, gam jaw gam ya ai bungli ni hta mung shakut let, ja

gumhpraw hpe mung, tam mahkawng da ra nga ai. Dai hta, hparan

hpareng ai lam, tam mahkawng shakut ai lam, gam jaw gam ya ai lam

ni hpe ahkyak shatai nna, kam sham ai hte, Karai Kasang a shaman

chyeju ni hpe hpaji rawng ai hku jai lang na matu shadum nga ai.

"Nanhte shada da a lit hpe gun hpai shingtau nna, Hkristu a tara hpe

shatup nga mu" (Galati 6:2) nga nna, Kasa Pawlu shadum ai hte maren,

shada da lit ni hpe gun hpai karum shingtau hkat nga nna, Hkristu hta

jung noi nga let, KBC makam hkring htawng hta, ngang ngang kang

kang tsap nna, Kachin myu sha ni a mai kaja ai ningli, Rudi maka hpe

shapraw sa wa ga. KBCUSA Ginwang kata nga ai Nu Wa Hpu Nau

kaji kaba ni yawng hpe hpan Wa Karai Kasang a mau hpa shaman

chyeju hte ngwi pyaw hkam kaja let, galaw gunhpai ai lam ni yawng

awngdang ngu kyuhpyi ya nngai law.

Rev. Masawn Shin Sai

Ningtau Amu Madu, KBCUSA

Washington, Oregon Kachin Baptist Church